कावळ्याला वाचवण्यासाठी अग्निशमन दलाची धावपळ; तब्बल तासभर चाललेले बचाव कार्य

लातूर शहरातील गांधी चौक परिसरात एक हृदयस्पर्शी घटना घडली. शिक्षण उपसंचालक कार्यालयाच्या आवारातील एका झाडावर नायलॉनच्या मांज्या दोऱ्यात अडकून एक कावळा लटकला होता. त्याच्या जोरदार आरडाओरडामुळे परिसरातील नागरिकांचे लक्ष वेधले गेले. त्यामध्ये शिवराम कांबळे यांनी पाहणी केली असता नायलॉनच्या दोऱ्यात गुरफटलेला कावळा दिसून आला. तात्काळ अग्निशमन दलाला संपर्क साधण्यात आला.

अग्निशमन दलाचे कर्मचारी घटनास्थळी दाखल झाल्यानंतर बचाव कार्य सुरू झाले. मात्र झाडाच्या उंचीमुळे आणि कावळ्याच्या अस्वस्थतेमुळे काम सोपे नव्हते. तब्बल एक तास चाललेल्या प्रयत्नांनंतर अखेर कावळ्याला सुरक्षित खाली उतरवण्यात आले. त्यावेळी त्याच्या पंखात नायलॉनची मांजा घट्ट अडकलेली होती. ती काळजीपूर्वक काढून टाकण्यात आली. कावळ्याला खूप तहान आणि भूक लागल्यामुळे त्याला पाणी व अन्न देण्यात आले.

बचावानंतर तपासणी केल्यावर कावळ्याच्या पंखाला इजा झाल्याचे स्पष्ट झाले. सध्या त्याची काळजी पक्षीप्रेमी मेहबूब घेत असून तो त्यांच्या निगराणीखाली आहे. अग्निशमन दल प्रमुख गणेश चौधरी यांनी या घटनेची माहिती देताना सांगितले की, अशा नायलॉनच्या मांज्यांमुळे पक्ष्यांचे जीव धोक्यात येतात. नागरिकांनी या धोकादायक मांज्यांचा वापर टाळावा असे आवाहनही त्यांनी केले.

ही घटना फक्त एका कावळ्याची सुटका नाही, तर पर्यावरण व प्राणीसंवर्धनाचा गंभीर संदेश देऊन जाते. आपल्यामुळे निर्माण होणाऱ्या संकटातून निरपराध पक्ष्यांचे जीव धोक्यात येत आहेत. त्यामुळे जनजागृती व संवेदनशीलतेने वागणे हीच खरी जबाबदारी आहे.